Petronorrek bat egin du Cámarabilbaok BBK Fundazioarekin batera sustatzen duen Jasangarritasun Hub-arekin

Petronorrek Jasangarritasun Hub-ari (ESG HUB) atxikitzeko hitzarmena sinatu du. Ekimen hori Bilboko Merkataritza Ganberak eta BBK Fundazioak bultzatu dute, enpresa-sareari laguntzeko, gero eta zorrotzagoa den araudi bat eta enpresa jasangarriak eskatzen dituen gizarte baten eskaerak betetzeko.

Helburua da Bizkaiko enpresak aitzindari izatea jasangarritasun-eskakizunetara egokitzen, honek jasotzen dituen hiru eremu hauetan: ingurumena, gizartea eta gobernantza (ESG, ingelesezko sigletan). Egokitzapen goiztiarra lehiakortasun-faktore giltzarria da, eta arlo horretan atzeratzeak arriskuan jar dezake enpresaren iraunkortasuna. Izan daitezkeen administrazio-erantzukizunez gain, jasangarriak ez diren enpresek oso zaila izango dute finantzaketa lortzea eta bezeroak beren balio-proposamenaz konbentzitzea.

Hitzarmena Abanto-Zierbenako Parke Teknologikoan kokatzen den Petronorreko EIC – Energy Intelligence Center-en sinatu da, eta han izan dira José Gregorio Luque, Petronorreko kontseilari delegatua, eta Mikel Arieta-araunabeña, Bilboko Merkataritza Ganberako idazkari nagusia.

Petronorreko kontseilari delegatu Luque jaunak honako hau adierazi du: “Petronorrentzat jasangarritasuna eta ESG printzipioak (Ingurumena, Gizartea eta Gobernantza) gure DNAren parte dira. Orainarekin eta etorkizunarekin, pertsonen eta ingurunearen ongizatearekin, eta industriatik eta teknologiatik deskarbonizazioarekin konprometitzeko gure modua da. Azken batean, konponbidearen parte izateko konpromisoa hartzea. Horregatik guztiagatik, guretzat logikoa eta naturala da Ganberak eta BBK Fundazioak bultzatutako Jasangarritasun Hub-arekin (ESG) bat egitea ”

Bilboko Merkataritza Ganberako idazkari nagusi Mikel Arieta-araunabeñarentzat: “Deskarbonizazioaren alde lan egiten duen Petronor enpresaren laguntza izateak berretsi egiten du aurtengo otsailean sortu genuen ekimen hau, gure enpresei lehiakorragoak izaten lagunduko dien eta, aldi berean, aldaketa sozial positiboak ekarriko dizkien bidea erraztu eta aholkatu nahi diena. Enpresa mota guztiei irekita gaude, eta bakoitzaren diagnostikoetan eta egoeran oinarrituta, neurrira egindako gakoak eta tresnak emango dizkiegu, beren beharretara eta ezaugarri zehatzetara egokitzeko”. Arieta-araunabeñak azpimarratu duenez, jasangarriagoak izateak “negozio eta merkatu berriak irekitzea ahalbidetuko du, enpresa jasangarriekin lan egitea eta erostea eskatzen duten bezero eta kontsumitzaileen beharrak aseko ditugulako”.

ESG Hub foro plurala da, topagune irekia. Bertan, tamaina eta sektore guztietako enpresek eta beren interes-taldeek ESG irizpideak kudeaketan integratzeak dakartzan erronkei buruzko informazioa jasotzeko aukera izango dute, eta, aldi berean, prestakuntza jasotzeko, ezagutzak eta tresnak eskuratzeko eta esperientziak partekatzeko aukera ere.

ESGaren abantailak eta lehen etapa

ESGak abantaila ukigarri eta zehatzak ditu, hala nola Europar Batasunak bultzatutako legea betetzea, 2026an Jasangarritasun-plan bat izateko betebeharra barne. Kasu askotan enpresa handiei bakarrik eragiten die, baina Bizkaiko enpresa askok, horien balio-katearen parte diren heinean, behartuta ikusten dute beren burua merkatutik kanpo ez geratzeko. Enpresak Net Zero ekonomiarantz eraldatu behar dira horrek dakarren guztiarekin, eta batzuentzat inbertsio handiak izango dira, baita merkatua edo produktua aldatzea edo bezeroen eta interes-taldeen eskaeretara egokitzea ere.

Horretarako, ESG Hub-k laguntzen die finantzaketa-iturriak aurkitzen, lankidetza handitzen, jasangarritasunaren bidez negozio-aukera berriak lortzen merkatu lokal zein global batean, eta gai horretan laxoagoak diren beste herrialde batzuen aurrean diskriminatuak izan ez daitezen. ESGn inbertitzeak finantza-onura bat izango du inplizituki, EBk, Europako bankuen bidez, finantzaketa oso onuragarria eskaintzen baitie irizpide horiek betetzen dituztenei, hala nola kreditu berde bigunagoak, bonu berdeen bidezko finantzaketarako sarbidea edo lizitazio publikoetako abantailak. Horrekin batera, ospea hobetu da bezeroei, langileei eta, oro har, gizarteari begira.

Hub-aren lehen etapa honetan, informazio- eta sentsibilizazio-lan bat egiten ari gara, enpresek ESG ikuspegia modu sistematikoan inplementatu ahal izan dezaten beren kudeaketa-ereduetan. Horrela, Bruselak derrigortzen duen enpresa-eredua betetzen laguntzeaz gain, jasangarritasunaren kudeaketa hazkunde-palanka bat dela jakinarazi nahi zaie guztiei, baita oraingoz legez behartuta ez daudenei ere, Bizkaiarentzat lehiarako eta garapen iraunkorrerako abantaila bihurtuko dena.

Informazio gehiagorako www.esghub.eus