“Taxonomia sozialari buruzko legedia aukera bat da enpresak lehiakorragoak izateko”

BBK ESG Hub Cámarabilbaok duela urtebete hasi zuen bere lehen jarduera zikloa itxi du, taxonomia sozialari buruzko jardunaldi batekin. BBK Banku Fundazioaren eta Bilboko Merkataritza Ganberaren ekimen honek, Petronorren lankidetzarekin, Bizkaiko enpresen lehiakortasuna lagundu eta bultzatzeko, honako enpresa hauen ordezkari izan ditu gaurko honetan: energia berriztagarriko proiektu handien garapenean, eraikuntzan, merkaturatzean eta operazioan espezializatuta dagoen Zelestra enpresakoa; Euskadin erreferentea den eta Gizarte Segurantzarekin elkarlanean aritzen den Mutualia mutualitate lokalekoa; eta 2030 Agenda eta haren Garapen Jasangarriko Helburuak tokian-tokian aplikatzen laguntzeko eta bizkortzeko Nazio Batuen 2030 Tokiko Koalizioarena, Nazio Batuen sistemaren plataforma eta sarea.

Asocimi-ko kontseilariak, Tubacex Fundazioko Patroiak eta Firstlehen enpresako zuzendari eta fundatzaile Marta Areizagak topaketaren dinamizatzaile lanak egin ditu, eta taxonomia soziala araudia dela gogorarazi du, ingurumen-taxonomia bezala. Bruselako legedia da, oraindik promulgatu gabe dagoena, “baina jasangarritasun txostenen zuzentarauak jada lau blokeri buruzko informazioa ematea eskatzen du: giza eskubideak, lan harremanak, komunitatearekiko harremanak eta bezero kontsumitzailearekiko harremanak”.

Hiru parte-hartzaileen azalpenean argi geratu da “legeriak lagun dezakeela enpresa barruko helburuak ordenatzen, antolatzen eta lehenesten. Tsunami legegile honek guztiak ez digu lehiakortasuna kentzen, alderantziz, lehiakorragoak izateko aukera da”.

Bere hitzaldian, Zelestrako ESGko zuzendari Sara Peñak adierazi du ESGren hiru letrak konpainiaren negozio-estrategiaren barruan kokatu behar direla, eta S-ren ardatz gisa nabarmendu ditu talentua, segurtasuna eta osasuna, balio-kate jasangarria eta inpaktu soziala. Besteak beste, honako ekintza hauek aipatu ditu: langileei harrera ona egitea, prestakuntza eta garapen pertsonaleko plan ugari gauzatzea, aniztasunaren eta inklusioaren alde lan egitea, kontziliazioa zaintzea, barne-komunikazioan sakontzea eta langileen defendatzailearen irudia sortzea.

Iñigo Arbiol Nazio Batuen Tokiko 2030 Koalizioko zuzendari ondokoak taxonomien jatorria azaldu du. “ESG finantza mundutik sortu da, hau konturatu baitzen ezin dela bakarrik bizi epe laburrean, eta bere erabakitze prozesuetan ingurumenaren eta gizartearen alderdia txertatu behar zuela, hori neurtu eta giza eskubideak erdigunean jartzeko parametro batzuk jarri behar zituela”. Azken helburua epe luzerako inbertsioa erakartzea dela gogorarazi du, deskarbonizazioa bezalako prozesuak ez direla etsai eta konplexua izan arren, lehiakorragoak izateko aukera ematen digula.

Bestalde, Natxo Lekunberri Mutualiako zuzendari gerenteak azaldu du zer hausnarketak bultzatu zuen erakundea taxonomiari ikuspegi estrategikoarekin ekitera eta nola txertatu duten erakundearen kulturan, bezeroaren defendatzailearen irudia ere sortu arte. Gobernantza (erakundearen organigrama, prozedurak eta, are, prestakuntza-sistemak) eta helburua (balioak, hizkuntza, etab.) landu zituzten, eta hori guztia beren plan estrategikoan txertatu zuten.

Hiru parte-hartzaileak bat datoz esatean taxonomia soziala beste biak baino zailagoa dela neurtzen, subjektibotasun handiagoa dagoelako, baina badira hobetzen joan behar diren adierazleak ere, eta Ganberak bezalako erakundeak funtsezkoak dira enpresekin batera ESGan kontzientziatzeko, barneratzeko eta deskubritzeko, “dena gure lehiakortasunerako aukera gisa ikusi behar delako”. Hori egiten ez dutenek duten arriskua deskapitalizazioa da. “Kanpoan zaude egiten ez baduzu”, izan da azpimarratutako ideietako bat, baita “enpresa handiek txikiak sarraraziko dituzte, nahiz eta konbentzituta ez egon; izan ere, nork onar dezake kontratazio-prozesuetatik kanpo egotea?”.

Jardunaldian, halaber, Veronica Urda BBK-ko Gizarte-eraginaren arduradunak ere parte hartu du, eta hauxe nabarmendu du: “Taxonomia sozialak ez du soilik daukagun mundua deskribatzen. Nahi dugun mundua eraikitzen laguntzen digu”. Itxieran, Inés Zalbide Bilboko Merkataritza Ganberako Berrikuntza eta Jasangarritasuneko zuzendariak gogorarazi du ESG hub-ek urtebete betetzen duela jardunean, eta horrek gaitasuna ematen digula aurrera egiteko eta enpresei laguntzeko. Hori da Merkataritza Ganbera baten berezko rola, eta, horregatik, sentsibilizazio-lan horrekin jarraituko dugu, eta hainbat programa aktibatuko ditugu enpresekin batera lan egiteko”.