Cámarabilbaok Bizkaiaren, bertako enpresen eta profesionalen lehiakortasuna hobetzeari laguntzen jarraitzeko Plan estrategikoa aurkeztu du

Bilboko Merkataritza, Industria, Zerbitzu eta Itsasketa Ganberak, Bizkaiko enpresei kalitateko zerbitzuak ematen 137 urte daramanak, gogoeta estrategiko bat egin du hurrengo urteetan bete behar duen zeregina aztertzeko, enpresari, erakundeei eta gizarteari babesten, sostengatzen eta laguntzen jarraitzeko, eta, hala, Bizkaia lurralde aberatsagoa, kohesionatuagoa eta jasangarriagoa bihurtzeko. Hausnarketa-prozesu horretan aktiboki parte hartu dute Ganberako profesionalek, eta bere osoko bilkura osatzen duten enpresen ekarpenak eta kontrastea izan ditu.

José Ignacio Zudaire Ganberako presidentearen hitzetan, “zuzenbide publikoko eta kudeaketa pribatuko korporazio gisa, Ganberak posizio ezin hobea du lankidetza publiko-pribatuaren alde egiteko eta, Bizkaiko enpresa-sarea egokitzeko prozesuaren buru izateko etorkizunari begira aurkezten zaizkien erronkei aurre egiteko, baina baita erronka horiek aprobetxatzeko eta aukera bihurtzeko ere”.

Plan estrategikoak Ganberarako eredu irekia, hurbila, proaktiboa, berrikuntzarekin, ekintzailetzarekin eta jasangarritasunarekin konprometitua proposatzen du, eta, aldi berean, enpresetara hurbiltzen dena, haien beharrak ezagutzeko, baita erakunde eskudunetara ere, hobekuntza horiei erantzun dezaten eta aholkuak emateko.

Eredu horretatik abiatuta, Bilboko Merkataritza Ganberak erakunde publikoen eta enpresa-ekimenaren arteko topagune gisa duen zeregina finkatu nahi du, eta, hala, interes orokorrak defendatzeko gizarte zibilaren artikulazioaren adierazle nagusia izaten jarraitu. “Ehun urtetik gorako erakundea gara, eta horrek jakintza eta esperientzia ematen dizkigu, eta, aldi berean, berritzen dakien erakunde bat gara, esateko eta ekarpenak egiteko gaitasuna duena, eta, horregatik, enpresen ahots gisa dugun zeregina berretsi nahi dugu —bai enpresaburuak, bai autonomoak edo soldatapekoak—, eta, aldi berean, erakundeen aurrean duten ahotsa izatea. Azken batean, bien arteko bidea gara, elkarri entzuteko lotura, eta proaktiboak izan nahi dugu, eta formula eta ekimen berriak proposatu nahi ditugu, Lurralde osoaren onurarako”.

Horretarako, Ganberak hiru lan-eremu landuko ditu: Lurralde lehiakorra eta erakargarria garatzea, Bizkaiko enpresak maila globalean lehiatu ahal izan daitezen eta inbertsioak eta talentua erakartzeko, enpresaren eta enpresaburuen lana balioa azpimarratuz; enpresak lehiakorrak, berritzaileak, nazioartekotuak eta kudeaketa-eredu aurreratukoak izan daitezen laguntzea, erronka ekologiko, digital eta demografikoei aurre egiteko gai izan daitezen; eta talentua eta pertsonak erdigunean jartzea, gaur egungo eta etorkizuneko profesionalak, prestazio handikoak eta proiektu partekatu batekin konprometituak.

Plan Estrategikoak, zehazki, bost lehentasun estrategiko eta horien inguruan bildutako lehentasunezko hamabi ekimen ezartzen ditu.

1. Erreferentzia izatea lurralde lehiakorragoa eraikitzen laguntzeko. Alderdi horrek lau ekimen biltzen ditu: Arku Atlantikoaren lehiakortasuna hobetzea, lurralde oparoagoa eta bizi-kalitate handiagokoa lortzeko; Bizkaia 2030 Foroa sortzea, Lurraldearen eta bertako enpresen lehiakortasunaren diagnostiko eguneratu eta egiaztatua lortzeko; inbertsioak eta talentua ‘Invest in Bizkaia’ren bidez erakartzea, hazkundea eta ezagutzen transferentzia sustatzeko; Ekonomia Ituna defendatzea, Bizkaia lurralde erakargarri eta lehiakor bihurtzeko elementu bereizgarri gisa.
2. Beharrak garaiz identifikatzea, zerbitzu berriak garatzea eta daudenak egokitzea. Esparru horretan, lehentasunezko hiru ekimen ezarri dira: Bizkaia Jasangarritasun Hub proposamena zabaltzea, Ganbera eta haren partnerrak Bizkaiko enpresen aliatu estrategiko gisa kokatzeko, ESG araudi berria hedapen eta betetzean, laguntza-zerbitzu batekin; kanalak sortzea, Lurraldeko enpresa traktoreen ahalmena aprobetxatzeko, ETEak mentorizatuz, nazioartekotze-planak ezartzen ari direnekin lankidetzan aritzeko; zerbitzu digital berriak, espezializatuak eta balio erantsia ematen dutenak garatzea, zerbitzu-emaile gisa kokatzeko.
3. Etorkizunerako behar diren gaitasunen eta talentuaren garapena ziurtatzea eta proiektu partekatuak eraikitzeko aukera ematen duten balioak lantzea. Horretarako, hiru ekimenen aldeko apustua egin da: Unibertsitate Eskolaren balio-proposamena hobetzea, Cámarabilbao University Business School proiektua indartuz; belaunaldien arteko ordezkapenaren kudeaketari ekitea, ezagutzak eta balioak transmititzen lagunduko duen mentorizazio-programa baten bidez; eta ekintzailetzarako/barne-ekintzailetzarako trebakuntzarako ikaskuntza-programa berriak proposatzea, proiektu ekintzaileen arrakasta-aukerak hobetzeko formula gisa, eta enpresa-topaguneak sustatzea eta/edo berraktibatzea, jardunbide egokiak partekatzeko eta joerak zabaltzeko.
4. Aliantzak eta sareak garatzea eta balioestea. Hemen ekimen bat markatzen du: dauden sareak eta aliantzak indartzea, Bizkaiko enpresentzako itzulkina sortzen duten ekimenak edo proiektuak identifikatu eta garatzeko eta, aldi berean, eskualdeko agentziekiko lankidetza areagotzeko.
5. Bere zerbitzuen eraginkortasuna eta kalitatea ziurtatzea. Horretarako, lehentasunezko ekimen bat garatuko da: kudeaketa-eredu aurreratu bat, prozesuen sinplifikazioa eta automatizazioa barne hartzen dituena, eraginkorragoak eta egokituagoak izan daitezen; barne-komunikazioa hobetzea; eta talentuaren garapena, Ganberako talde osoari beharrezko trebetasunak emanez arrakastarako, bai bakarka, bai antolaketa mailan.

Ibilbide-orri honekin, Ganberak aintzatetsia izan nahi du:

• Gizarte zibilaren erreferentzia izateagatik arlo ekonomikoan, gai baita eztabaida handiak mahai gainean jartzeko, mezu horiek helarazteko, erakundeak nahiz enpresak partaide egiteko, eta eragin izateko.
• Bizkaiko enpresentzat erakunde garrantzitsua izateagatik eta Bizkaiko ekonomia-sarearen lehiakortasuna eta jasangarritasuna bultzatzeko neurriak garatzen eta ezartzen administrazio publikoen aliatu gisa.
• Enpresei lehiatzen eta enpresa berriak eta talentu berria erakartzen lagunduko dien lurralde erakargarriagoa eta lehiakorragoa eraikitzen laguntzeagatik.
• Egungo eta etorkizuneko profesionalen trebakuntzarekin duten konpromisoagatik. Ezagutzak eta balioak dituzten profesionalak.

Eta hori guztia pertsonetan oinarritutako kudeaketa-eredu aurreratuarekin.

Bilboko Ganbera, Bizkairako aktibo bat

Merkataritza-ganberek indarrean jarraitzen dute gaur egun ere, lurraldearen eta enpresen lehiakortasuna hobetzen laguntzen duten tresna gisa, nahiz eta azken urteotan hainbat eragile agertu diren, bai eremu publikoan, bai pribatuan ere, kasu batzuetan antzeko funtzioak dituztenak.

Bakarrak bihurtzen dituen izaera dute: izaera publikoa eta kudeaketa pribatua, eta horrek tresna egokia bihurtzen ditu gaur egun lehiakortasun-politikak garatzeko giltzarritzat hartzen den lankidetza publiko-pribatua antolatzeko.

Bilboko Merkataritza, Industria, Zerbitzu eta itsasketa Ganbera izan zen 1886an Espainian sortu zen lehen ganbera, eta, publikoa denez, merkataritzaren, industriaren, zerbitzuen eta nabigazioaren interes orokorrak ordezkatzen, sustatzen eta defendatzen ditu. Bere azken helburua Bizkaiko enpresei kalitatezko zerbitzuak eskaintzea da.

Bilboko Ganberak, bere 137 urteko historian, industrializazio-prozesu eta garapen ekonomiko arrakastatsuenetako baten sortzaile eta lekuko izan da, Bilbokoa eta, hedaduraz, Bizkaikoa.

Halaber, Bizkaiko garapen sozioekonomikorako hainbat proiektu edo jarduera bultzatu ditu zuzenean edo beste erakunde batzuekin elkarlanean. Hala, Bilboko Ingeniarien Eskola, Merkataritzako Goi Eskola, Nazioarteko Erakustazoka, Gordailu Zabala, Bilbao Air, Sarrikoko Ekonomia Zientzien Fakultatea, Leioako Euskal Herriko Unibertsitatea, Mercabilbao; Arbitraje Gortea; Bilbao Air – Aireportua Sustatzeko Sozietatea; DigiPen Europe Bilbao, bideojokoen sektorea sustatzeko; Bilbo-Errioxa Hiriburuen eta Mahasti Handien Nazioarteko Sarean sartzea; Bilbao Dendak, hiri-merkataritza sustatzeko erakundea; edo Itsasmuseum  martxan jartzen lagundu du.

Horrez gain aipatu behar dira zuzenean garatu dituen eta gaur egun Erakundearen parte diren proiektuak, hala nola Arbitraje eta Bitartekaritza Gortea, Marketineko Unibertsitate Eskola, Hizkuntza Eskola, kudeaketako graduondoko ikastaroak, gure enpresak nazioartekotzeko Esportazioen Ganbera Plana eta, berrikiago, Cámarabilbao ESG Hub, Lurraldeko enpresa-sareari hazteko eta lehiakor izateko estrategia jasangarria zabaltzen laguntzeko lan-ildo berri bat, Bizkaiko erakunde publiko eta pribatu guztiek parte har dezaten, bai erabiltzaile gisa, bai proiektuko partaide gisa.

2022ko azaroaren 15ean, sektore guztietako Bizkaiko enpresen arteko hauteskunde ireki batzuen ondoren, korporazioaren osoko bilkura berria eratu zen, 60 kidek osatua, eta José Ignacio Zudaire hautatu zuten presidente.

Cámarabilbaon 57 langilek egiten dute lan, eta horiei Unibertsitate Eskolako 46 irakasle gehitu behar zaizkie. Datozen lau urteetarako, Bizkaiko enpresei eragingo dien 45 milioi inguruko aurrekontua aurreikusten du.

750 enpresa baino gehiago hartzen ditu urtean hainbat lan-arlotatik: nazioartekotzea, enpresak sortzea, gatazkak konpontzea, lehiakortasuna eta berrikuntza, merkataritza eta turismoa, familia-enpresa, trebakuntza edo ESG. Era berean, egoera ekonomiko eta industrialari buruzko azterlanak, analisiak eta inkestak egiten ditu, eta horietako asko beste erakunde publiko zein pribatu batzuekin elkarlanean.

Cámara University Business School, graduondoko ikasketak, enpresa-prestakuntzak eta hizkuntzak batuz, urtean 30.000 prestakuntza-ordu inguru ematen dizkie 2.800 ikasleri.