Kontsumobidek saltokiak Kontsumoko Arbitraje Sistemara atxikitzeko kanpaina ireki du

Kontsumobide-Kontsumoko Euskal Institutuak kanpaina bat jarri du abian Kontsumoko Arbitraje Sistemara saltoki berriak atxikitzeko. Abenduaren erdialdean amaituko den deialdi honen bidez, une honetan 16.000 enpresa baino gehiago dituen sistema honekin bat egitea bilatzen da.

Zer da Kontsumoko Arbitraje Sistema?

Kontsumoko Arbitraje Sistema bide alternatibo eta eraginkorra da kontsumoarekin lotutako gatazkak ebazteko. Judizioz kanpoko sistema honek onura ugari dakarzkie enpresei eta kontsumitzaileei. Atxikitzea balio erantsia da enpresentzat, kalitatearekiko eta kontsumitzaileen eskubideen babesarekiko konpromisoa erakusten baitu.

Sistema azkarra da, gatazkak 90 eguneko epean konpontzen dituena, eta auzi judizial garestiak eta luzeak saihesten dituena; horrek denbora eta baliabide asko aurreztea dakar.

Enpresentzat, Kontsumoko Arbitraje Sisteman sartzeak produktuen eta zerbitzuen pertzepzioa hobetzea dakar. Kontsumitzaileei berme gehigarri bat eskaintzen diete erosketetan, eta horrek bezeroen konfiantza eta leialtasuna indartzen ditu. Gainera, atxikitako enpresen erroldan agertzen direnez, erraz identifika ditzakete kontsumitzaileek Kontsumobide-Kontsumoko Euskal Institutuaren webgunearen bidez. Horrek lehiarako abantaila ematen die enpresei; izan ere, kontsumitzaileek nahiago izaten dituzte gatazkak modu zuzen eta eraginkorrean konpontzeko konpromiso argia erakusten dutenak.

Kontsumoko Arbitraje Batzordea prozedura zuzentzeaz arduratzen den administrazio-organoa da. Kontsumo-gatazka ebazteaz arduratzen diren bi arbitraje-organo daude, erreklamatzen den zenbatekoaren arabera:

• Pertsona bakarreko arbitraje-organoa: 300 €baino gutxiagoko erreklamazioetarako.
• Arbitraje-elkargoa: 300 €-tik gorako erreklamazioak. Hiru pertsonak osatzen dute: batek enpresa-sektorea ordezkatzen du, beste batek kontsumitzaileen elkarteak, eta beste batek administrazioa.

Nola funtzionatzen du arbitraje-prozedurak?

Kontsumoko arbitraje-prozedurak kontsumitzaileen eta enpresen arteko auziak modu zuzen eta eraginkorrean ebaztea bilatzen duten hainbat urrats jarraitzen ditu.

1. 1. Kontsumoko Arbitraje Batzordeak erreklamatutako enpresari jakinarazten dio kontsumitzaileak aurkeztutako arbitraje-eskaera.
   2. Bitartekaritza-fasea hasten da, eta bi alderdien arteko akordioa lortu nahi da, arbitraje-organoetara jo gabe.
   3. Bitartekaritza-fasean akordiorik lortzen ez bada, arbitraje-hitzarmena egingo da. Puntu horretan, bai enpresak bai kontsumitzaileak arbitraje-sistemaren mende jartzea erabaki dute. Enpresa sistemari atxikita badago, hitzarmena automatikoa izango da; bestela, 15 eguneko epea izango du onartzeko.
   4. Aldeei entzunaldia ematen zaie, eta bakoitzak bere alegazioak eta asmoak aurkezteko aukera du.
   5. Peritu-frogak egin daitezke, arbitraje-elkargoak beharrezkotzat jotzen badu, eta alderdiek froga gehigarriak ere eska ditzakete, eta kostuak eskatzen dituenak ordainduko ditu.
   6. Arbitraje-laudoa arbitraje-organoen erabakia da, eta loteslea da, bi alderdiek nahitaez bete beharrekoa, epai judizial baten baliokidea. Prozesu horrek kontsumo-auzietarako konponbide azkar eta eraginkorra bermatzen du, justizia eta kontsumitzaileen eskubideen babesa sustatuz.